நல்லாச்சி

சூரியனின் திசையினின்று 

விழிநோக்கு திருப்பாத

சூர்யகாந்திகள் எங்குமுண்டு

இங்கோ..

இந்த சூர்யகாந்தியையே 

எப்பொழுதும் நோக்கியிருக்கும்

முதற்சூரியன் நான்

என் துணைக்கோள் நீதானடியென

கன்னம் வழித்து 

கண்ணேறு கழிக்கிறாள் நல்லாச்சி

எனில் உங்களை விட்டலகலா தாத்தா 

யாரென வினவிய பேத்தியிடம்

'அது ஒரு கெரகம்' என

குறும்புச்சிரிப்புடன் பகன்றாள் சூரியஆச்சி

அசட்டுச்சிரிப்புடன் நழுவுகிறார் தாத்தா.