அம்மாவின் தம்ளர்.

தம்ளரின் பக்கவாட்டில்

நெருடுகிறது

செதுக்கப்பட்டிருக்கும் அம்மாவின் பெயர்

விரலால் நீவுகையில்

அம்மாவின் 

பழம்புடவை வாசம்

சிலருடன் ஆடை அணிகலன்களாய்

சிலருடன் புகைப்படமாய் 

சிலருடன் வெற்று நினைவுகளாய்

இருக்கும் அம்மா

தம்ளராய்த்தான்

வாசம் செய்கிறாள் எங்களுடன்

ஆறி ஆடை படர்ந்திருக்கும்

ஏதோவொரு திரவம்

கொண்ட தம்ளரை

நடுங்கிய கைகளில் ஏந்தி

கொல்லைப் படிக்கட்டிலமரும்போது

நுரைத்துச் சுடுகிறது காப்பி

அது

அம்மா டம்ளர்

கண்மூடி லயித்து அருந்துவதும்

அவள் கொடுத்ததுதான்.