பாவனைகள்..

சற்றே இடறி விழுந்தான்

அடிபட்ட பாவனையில் கோணியது முகம்

வலித்திருக்க வேண்டும்

ஆதரவாய் 

தன் பூனையை அணைத்துக்கொண்டான்

முகத்தோடு முகம் வைத்துக்

கொஞ்சியது அதுவும்

ஆறுதலாய் ம்யாவியது

தோளுறங்கித் தேற்றியது

கூரிய மீன்முள் பற்களைக்காட்டி

நீண்ட கொட்டாவி விட்டபின்

மடியிலிருந்து குதித்திறங்கி

எனக்கொன்றும் ஆகிவிடவில்லை பார்

என்ற பாவனையில் 

தோளை நிமிர்த்திக்கொண்டு

நீளமாய் நடந்து போனது

ஆழுறக்கத்தில் வீழுமுன்

கடைசியாய் கனவிலென

அவன் நினைவுக்கு வந்தது

இடறி விட்ட அதன் வால்.