சிறகுதிர்த்த மின்மினி.. (வல்லமையில் வெளியானது)

இணையத்தில் சுட்ட படம்..

மின்மினி மந்தையினின்று
வழி தப்பிய எரிகல்லொன்று
கவணிடை
எறிகல்லாய்ப்புறப்பட்டது..
வெகுதூரப்பயணமோவென
ஏங்கி வினவிய சகாக்களைப்
புறங்கையால் ஒதுக்கிவிட்டு
உல்லாசமாய்ப்புறப்பட்ட உற்சாகத்துடன்
துள்ளித்துழைந்தது அண்டப்பெருவெளியில்.
இலக்கில்லாப்பயணத்தில்
அதிரும் பிம்பங்களைச் சிதற விட்டபடி
துழாவித்துழாவி உணர்கொம்புகள் நீட்டி
முன்னேறிக்கொண்டுதானிருந்தது அது.
இலக்கில்லா எவரோ.. எதுவோ.. 
ஓர் நாள்
இலக்கினை அடைந்தே தீரவேண்டிய
நியதிக்குட்பட்டு
பூமாதேவியிடம் மயங்கி
முத்தமிட முயன்றதில்
சீறி எரித்தது
லக்ஷ்மண ரேகை..
உதிர்ந்து வீழ்ந்தது மின்மினி
ஆயிரமாயிரம் பரப்பளவில் தன் சிறகுகளை உதிர்த்தபடி..

டிஸ்கி: வல்லமையில் வெளியானது.

உணர்வுகளும் அமைதியும்..(இன் அண்ட் அவுட் சென்னை இதழில் வெளியானது)

பிளிறலுடன் நிலையத்தினுள்

நுழைந்தது ரயில்

மதம் பிடித்ததுவோ எனவஞ்சும்படி

ஆர்ப்பரித்துக்கொண்டு.

அரைகுறை உறக்கத்தில்

ஒவ்வொரு இலையாயுதிர்த்துக்கொண்டிருந்த

அரச மரமொன்று

தடதடவென அகிலமெங்கும் கிடுகிடுத்ததில்

சரசரவென வியர்த்துக் கொட்டியது

இலைத்துளிகளை

மடியில் உறங்கிக்கொண்டிருந்த

நாய்க்குட்டியின் மேல்..

அதிகபட்ச எதிர்ப்பாய்த்

திரும்பிப்படுத்துறங்குதலைக் காட்டிய

நாயிடம் கோபித்துக்கொண்டு

வெளியேறிக்கொண்டிருந்தது ரயில்

புயலென

கைகாட்டி மரத்தின் அசைவுக்கு

மனிதர்களை உதிர்த்து விட்டு..

டிஸ்கி: கவிதையை வெளியிட்ட இன் அண்ட் அவுட் சென்னை இதழுக்கு நன்றி.

ரயிலோடும் வீதிகள்.. (நவீன விருட்சத்தில் வெளியானது)

(இணையத்தில் சுட்ட படம்)

கயிற்று வளையத்துள்

அடைபட்டிருந்த பெட்டிகளெல்லாம்

அலுத்துக்கொண்டனர்,

ரயில் மெதுவாகச்செல்வதாக..

குதித்துக் கும்மாளமிட்டுச்

சூறாவளியாய்க் கிளம்பிய ரயில் பெட்டிகள்

ஒன்றுக்கொன்று இடித்துத் தள்ளியதில்

தடம்புரண்டோடிய

உற்சாக ஊற்று

சற்றுச்சுணங்கிற்று அவ்வப்போது.

பிள்ளையார் கோவில் நிறுத்தம்

இந்நேரம்

தாண்டப்பட்டிருக்க வேண்டுமென்ற

மூன்றாவது பெட்டி காளியப்பனை

ஆமோதித்தாள்

ஐந்தாவது பெட்டியான வேலம்மாள்.

“வெரசாத்தான் போயேண்டா”

விரட்டிய குரலுக்குத்தெரியாது,

ரயிலோட்டுனருக்கு

அன்றுதான்

காலில் கருவை முள் தைத்ததென்பது.

அலுத்துப்போன கடைசிப்பெட்டி

சட்டென்று திரும்பிக்கொண்டு இஞ்சினாகியதில்

வேகம் பிடித்த ரயிலில்

இழுபட்டு அலைக்கழிந்து வந்தது

முன்னாள் இஞ்சின்

வலியில் அலறிக்கொண்டு..

டிஸ்கி: வெளியிட்ட நவீன விருட்சத்திற்கு நன்றி.

தொலைந்த நிழல்..(நவீன விருட்சத்தில் வெளியானது)

மதிய வெய்யில் உறங்கிக்கொண்டிருந்த வீதிகளில்

தேடலுடன் நகர்ந்து கொண்டிருந்தது அந்த நிழல்.

பூவரச மரத்தின் கீழ் துயின்ற

பூச்சருகுகளின்

உறக்கம் கலைக்காமல்

வார்த்தைக்குள் வராத சங்கீதத்தை

வாய்க்குள் மென்று கொண்டே

தான் தொலைந்த இடத்தைத்

தேடிக்கொண்டிருந்தது.

கலகலப்புகளிலும்

சின்னக்கொலுசுகளின் கிணுகிணுப்புகளிலும்

ஆலமர ஊஞ்சல்களிலும்

தன்னைத்தேடிச் சலித்த அது

ஜவ்வு மிட்டாய்க்காரனின் பின்னே

போய்க்கொண்டிருந்தது

தானும் கைதட்டிக்கொண்டு.

பல்லாயிரம் வாசனைகளுக்கிடையே

மிதந்து வந்த தன்னுடைய வாசனை

கால்களைக்கட்டியிழுக்க

தொலைந்த இடம் சேர்ந்த மகிழ்வுடன்

ஓடிச்சென்று விரல் பற்றிக்கொண்டு

பாண்டியாடத்தொடங்கியது

பாவாடை பறக்கப் பறந்து கொண்டிருந்த சிறுமியுடன்.

டிஸ்கி: நவீன விருட்சத்திற்கு நன்றி :-)

வலி மிகுந்த நேரம்....

சுயத்தை தொலைத்த

செயற்கை பூச்சுகளின் பின்னான முகம்

மறந்துதான் போகிறது.

எப்போதும் தயாராய்

சில முகமூடிகள்

மாட்டிக்கொள்ள தோதாய் .

தேர்ந்தெடுக்கும் குழப்பம்

எப்போதும் இருந்ததில்லை .

இருப்புக்கு தகுந்தாற்போல்

நொடிப்பொழுதில் மாறிவிடுகிறது,

பச்சோந்தியைவிட வேகமாக...;

எப்போதும் கிடைப்பவை

மலிவுவிலை புன்னகைகள் மட்டுமே.

சுமந்து திரியும் முகமூடிகள்

கழன்றுகொள்ளும் நேரங்கள்,

வலிமிகுந்ததாகவே இருக்கிறது

எப்போதும்!!!!

பொய்முகங்கள் தேவையில்லா

யாருமில்லா தனிவெளியில்,

கோரமாய் பல்லிளிக்கும் ;

ஒப்பனை கழுவப்பட்ட முகம்.

இடப்பெயர்ச்சி..

இணையத்தில் சுட்ட படம்..

பக்கத்து வீட்டுத் தாத்தா
திரும்பாப்பயணம் புறப்பட்டு விட
சலனமின்றி
இடம் பெயர்ந்தது சாவிக்கொத்து
முன்னுரிமைப்படி..

சாய்வு நாற்காலிக்கு அடுத்த தலைமுறையும்
சொகுசு நாற்காலிக்கு மூன்றாம் தலைமுறையும்
அவசரமாய் அடித்துக்கொண்டு
ஆரவாரமாய் இடம் பெயர
அமைதியாய் நிகழ்ந்ததோர் இடப்பெயர்ச்சி..
துணி மூட்டையுடனும் தட்டுடனும்
திண்ணையில் பாட்டி.

டிஸ்கி: வல்லமையில் வெளியானது.

கையறு நிலையில்..

இணையத்தில் சுட்ட படம்..

“எப்போதான் கண் திறந்து 
பார்க்கப்போறியோ?”
அங்கலாய்த்த பக்தனுக்குக்
கூரையைப்பிய்த்துக்கொண்டாவது
உதவிடும் துடிப்பில்
ஓடி வந்த கடவுள்
பேச்சற்று நின்றார்..
பிய்ப்பதற்குப்
பொத்தல் கூரைக்கும் வழியின்றி
வானமே கூரையாய்
உறங்கும்
நடைபாதை வாசியாய்க்கண்டு.