நல்லாச்சி

தங்க அரளி செம்பருத்தி பிச்சி அலமெண்டா என

பல வண்ணப்பூக்களுண்டு

பூஜைக்கென 

நல்லாச்சியின் தோட்டத்தில்

புலருமுன் அத்தனையும் பறிக்கப்பட்டு

தாத்தாவின் கைங்கர்யத்தால்

இறைவனைச்சென்றடையும் 

விடியலில் வந்த தேன்சிட்டொன்று

ஏமாந்து புலம்பியதையும்

வண்ணத்துப்பூச்சிகளெல்லாம்

தோட்டமெங்கும் தேடி அல்லலுற்றதையும்

பேத்தி கவனித்த தினத்திலிருந்து

செடிகொடிகள் இழக்காமலிருக்கின்றன

இறைவனுக்கு மானசீகமாகச் சமர்ப்பிக்கப்பட்ட

தத்தம் பூங்கிரீடத்தை

ஆலோசனை சொன்ன நல்லாச்சிக்கு

நன்றி நவின்றபடி.