துருவியைத் தொங்கவிட்டுக் கொண்டு
தன் பாட்டுக்குத்
தேமேயென நின்றிருக்கும்
ஜேசிபி இயந்திரத்தின் ஊடே புகுந்துசெல்லும்
பேத்தி சொல்கிறாள்
ஒரு யானையின் துதிக்கையினூடே
கடப்பதையொத்திருக்கிறதென
உப்பக்கம் நிற்கும் நல்லாச்சி
சிரித்துக்கொள்கிறாள்
என்றாவது
ஆசீர்வாதம் வழங்கும்
ஒரு யானையைக் கண்ணுறும்போது
அவளுக்கு
இயந்திரத்தின் சாயல் தென்படக்கூடும்
வாரியெடுக்கும் அவ்விரு உறுப்புகளுக்கு மட்டும்
தத்தம் சாயல் குறித்து
கிஞ்சித்தும் சிந்தனை
என்றுமே வரப்போவதில்லை.
