மிஞ்சும் சூன்யம்

கடலென விரிந்து பரந்திருக்கும்

பகலின் அலைகள்

ஒதுக்கிச்சேர்க்கும் அனுபவங்களின்

சிடுக்குகளிடையே மிதந்தலையும்

சிப்பிகளுக்கும் மற்றவற்றுக்குமூடே

விதியொளித்திருக்கும்

மின்னுஞ் சிறுமுத்து

ஏற்புடைத்தில்லை இது எமக்கு

பென்னம்பெரிதே எமக்குத் தகுதியென

அலசியலசி வீசியதில்

ஔியிழந்தனைத்தும் அகன்றுவிட

மிஞ்சிய இருட்சாகரத்தின் அமைதியில்

ஆதிமுத்து வந்தமர்கிறது

கிடைத்ததைத் தொலைத்து

கிட்டாததற்காய் ஏங்கி

பாழும் கனவுவெளியில் 

அங்கிங்கெனாதபடி தேடியலைந்த இறுதியில்

மிஞ்சுகிறது

ஒரு பிடி சூன்யம்.

பெருங்கருணை

தேர்ந்த நடனமங்கையின் நளினத்தோடு

இடுப்பை அசைத்தசைத்து

நீந்திக்கொண்டிருக்கிறது அம்மீன்

தொட்டுப்பிடிச்சு விளையாடிய

சகமீன்கள் ஒளிந்து கொண்டுவிட

தேடித் தட்டழிகிறது

சொப்பு வாய் திறந்து கூவியழைக்கிறது

ஆள் நிழல் கண்டதும் ஆழத்தில் மறைகிறது

மீனின் தவிப்பை 

தப்பர்த்தம் கொண்ட மரம்

காக்கும் நோக்கில்

இலைகளை உதிர்க்கிறது ஒவ்வொன்றாய்

மிதக்கும் இலையே கேடயமாய்

ஒளிந்து கொள்கிறது பயந்த சிறுமீன்

பதறும் மரத்திடம்

ஒன்று சொல்ல வாய் திறந்து

பின்

ஏதும் சொல்லாமல் இரை மேய்கின்றன

அத்தனை மீன்களும்.

கோமாளிப்புன்னகை

சர்க்கஸ் கோமாளிகள் நகைக்கிறார்கள்

அது அவர்கள் உலகம்

வலியில்லா வேதனையில்லா அழுகையில்லா

அபூர்வ உலகம் அவர்களுடையது

கேலி செய்வோரையும் வாய்மூட வைக்கும்

சுய எள்ளல்வாதிகள் அவர்கள்

விழுவதையெண்ணிப் பயந்தால்

பறப்பதெப்போது 

என்ற சித்தாந்த வாதிகள்

சொந்த ஊரில் மரமேறிப்பிழைத்தவன்தான்

இதோ

அடிக்கொரு தரம் தடுக்கிவிழுந்து 

அழுது ஊரைக்கூட்டுகிறான்

கிணற்று உள்நீச்சலில் கைதேர்ந்தவன்தான்

ஓரடி உயரத்திற்கே 

பாசாங்காய்ப் பயப்படுகிறான்

தோட்டாவாய் 

திணித்துக்கொண்ட பீரங்கி துப்பியதும்

அலறிப்பறக்கும் அவனைக்கண்டு

வெடித்துச்சிரிக்கிறது அரங்கம்

முகப்பூச்சுதான் 

எத்தனை வசதியானதாக இருக்கிறது

உணர்வுகளையெல்லாம் மறைக்க

வயது வேறுபாடின்றி 

அத்தனை பேரும் ரசிக்கும் அவன்மேல்

பசிக்குப் பெருங்காதல் 

அவனுக்கோ கலைமேல்

தன்னை வருத்திப் 

பிறரை மகிழ்விக்கும் அவன்

ஓர் நாள்

துடித்துத் துவண்டதையும் 

மெதுவாய் அடங்கியதையும்

கேளிக்கையாகவே எண்ணி

இவ்வுலகம்

கை தட்டிக்கொண்டிருக்கிறது உரக்க

பிறர் நகைக்க தானழுதவன் இதழ்களில்

இன்று

உறைந்து நிற்கிறது புன்னகை.

நல்லாச்சி - 32

வடாமும் வற்றலும் காயுமிடத்தில்

மொய்க்கும் காகங்களை

கட்டுப்படுத்த முயல்கிறாள் நல்லாச்சி

அவற்றுக்கொரு பங்கு

கொடுத்த பின்னும்

மேலுங்கேட்பதாக ஆவலாதி சொன்னவள்

அவற்றை விரட்டவென

நூறு உபாயங்களைக் கைக்கொள்கிறாள்

எல்லாக்கூத்தையும் கண்ட பேத்தி

சந்தேகம் கேட்கிறாள்

சில தினங்களில்

தலைவாழை விருந்திட்டு

முன்னோரென மதித்து

வாவென்கிறீர்கள்

இன்னும் சில தினங்களிலோ

வராதே போவென்கிறீர்கள்

குழம்பித்தவிக்கும் காகங்கள்

தன் பசியன்றி வேறெது அறியும்

என்ற பேத்தி

கைப்பிடி அரிசியை இறைக்கிறாள்

காகங்களெல்லாம் அத்திசை செல்கின்றன

பேத்தியை உச்சிநுகர்கிறாள் நல்லாச்சி.

நல்லாச்சி - 31

அட்டகாசம் செய்கின்றன குரங்குகள்

உன் போல் என

அலுத்தபடி வந்தாள் நல்லாச்சி

உண்ணாமல் தின்னாமல்

ஒரு வயிற்றுக்குள்ளும் போகாமல்

புழக்கடைத்தோட்டத்தில்

சூறைபடுகின்றனவாம் அத்தனையும்

பழிப்புக்காட்டி ஓடி விடும்

பல்லைக்காட்டி உறுமும்

மோனநிலையில் அமர்ந்திருக்கும் மந்திகள்

கூட்டத்திடையே

ஆத்தாளும் பேத்தியாளும் இருக்கக்கூடுமோ

என யோசனையிலாழ்கிறாள் பேத்தி

கவனம் சிதறிய கணத்தில்

கைக்கொண்ட நீர்ச்சொம்பைக்

கவர்ந்திழுக்கிறது

தாகித்திருந்த ஒரு குட்டி

இரு குரங்குகளும் போட்டியிட்டால்

என் செய்வேன் நானென

போலியாய் அபிநயிக்கிறாள் நல்லாச்சி

சிணுங்குகிறாள் பேத்தி சங்கீதமாய்.