விடிகாலை
கோழிகூவலில் ஆரம்பித்து
அந்தியில் மலரும்
நாலுமணிப்பூ வரைக்கும்
கச்சிதமாய் நேரம் சொல்லும் நல்லாச்சி
முற்பகலில் வரும் சிறுகுருவிக்கு
பதினொருமணிக் குருவியென்றே
பெயரிட்டிருக்கிறாள்
அவள் கடிகாரத்தை
உலைத்துப்போடும் மணிப்பயல் மட்டும்
வாலாட்டிக்கொண்டு
அதிகாரமாக வந்தமர்வான் இருளில்
ஒன்பதுக்கு மேல் பதினொன்றுக்ககம்
கடிகாரம் ஏதுமின்றியே நேரமுணரும் நல்லாச்சியிடம்
தனக்கும் அத்திறன் உண்டென மொழியும் பேத்தி
குறும்புடன் அடுக்குகிறாள் ஒவ்வொன்றாய்
அவளது கடிகாரத்தின் அத்தனை மணித்துளிகளுமே
சுற்றிச்சுழல்வதாக இருக்கின்றன
நல்லாச்சியை மையமாய்க்கொண்டு.
0 comments:
Post a Comment