அப்படி என்னதானிருக்கிறது?
குடைந்து
ஆராய்ந்து கொண்டிருக்கிறாள் பேத்தி
பொடி டப்பியும் வதங்கிய வெற்றிலையும்
தாத்தாவின் வெற்றிலைச்செல்லத்தில்
சிற்சில ரெவின்யூ ஸ்டாம்புகளும்
பிள்ளைகளின் போட்டோவும்
அப்பாவின் பர்ஸில்
சித்தப்பா அலமாரியின்
ரகசிய அறையில்
சிறையிருக்கும் சிறு டப்பாவில்
காய்ந்த ரோஜாவும் பஸ் டிக்கெட்டுகள் ஒன்றிரண்டும்
அம்மாவின் கைப்பையை அலசவோ
பாதாளக்கரண்டி வேண்டும்
இறுதி இலக்கு
நல்லாச்சியின் அஞ்சறைப்பெட்டி
பேத்தி தொடுமுன்
பாய்ந்து வந்து பத்திரப்படுத்தும் நல்லாச்சியின்
"ங்ஙேரு.. ஓடிரு"
சிரிப்பு பொதிந்த அதட்டலுக்கு
வாய் பொத்தி கிளுகிளுவெனக் குலுங்குகிறாள்
ரகசியம் தெரிந்த பேத்தி.
0 comments:
Post a Comment