பிழைத்துக் கிடக்கிறோம்..

என்னோட காமிராவுக்கு நன்றி சொல்லிக்கிறேன்

மனிதம் விற்று நடத்திய

சுயநல வியாபாரத்தில்

மிஞ்சியவை

மனிதனின் கணக்கில் லாபமாகவும்

இயற்கையின் கணக்கில் நட்டமாகவும்

வரவு வைக்கப்பட்டு விட.

கதிர்வீச்சு அழித்திட்ட

எங்கள் குழந்தைகளின் நினைவுகளைச்

சுமந்து கொண்டு..
சோலைகளிலும் வீட்டு முற்றங்களிலும்

விட்டு விடுதலையாய்த்திரிந்த

நாட்களை அசை போட்டபடி

அலைந்து திரிகின்றோம் அங்குமிங்கும்

பகடைகளாய்,

நீங்கள் ஆடும் சதுரங்கத்தில்..

சொந்த மண்ணிலேயே அகதிகளான

எங்கள் அபயக்குரல்கள்

எதிரொலிக்க வழியின்றி

என் அலகினுள்ளேயே

உங்கள் செவிகளை எட்டாவண்ணம்.

உறைந்து போய் விட

எங்களுக்கான வாழ்வாதாரங்கள்

கலைக்கப்பட்டு விட்ட பின்னும்

பிழைத்துக் கிடக்கிறோம்

ஒரு பிடி உணவிலும் ஒரு துளித் தண்ணீரிலும்

பச்சையம் மறந்த

இரும்புக்கிளைகளிலுமாக..

டிஸ்கி: குருவிகள் தினத்திற்காக வல்லமையில் எழுதுனதை இங்கியும் பகிர்ந்துக்கறேன்.