Pages

Saturday, January 28, 2023

நல்லாச்சி - 49


தொழுவம் நிறைந்த மாடு கன்றுகளும்
தோட்டம் நிறைந்த செடிகொடிகளுமாய்
செழித்துப் பொங்கியிருக்கிறது நல்லாச்சி வீடு
தோட்டத்தில் பூத்தவை போக
முல்லை மல்லி செண்பகம் ரஞ்சிதமென
தொழுவத்திலும் பூத்து கன்றுடன் நிற்பவற்றில்
கருப்பில் வெள்ளை தெளித்த
பிச்சிவெள்ளை மட்டும் பேத்தியின் பெருவிருப்பம்
மந்தையிலிருந்து வீடுபுகுந்ததும்
பேத்தியின் வாசம் தேடுவது அதற்கு வாடிக்கை
துணியோ சோப்போ
வாயிலகப்பட்டதைக் சவைத்துத் துப்புவதும்
ஹமாமை மட்டும் மென்று விழுங்குவதும் கூட
அதற்கு வாடிக்கையே
மூவந்தி மயங்கியும் வீடு சேராத பிச்சிவெள்ளைக்காய்
வாசல் நெடுக நடந்து தேய்கிறாள் நல்லாச்சி
முன்னங்கால் வீங்கி வந்து சேர்கிறது பிச்சிவெள்ளை
பயிர்பச்சை நாடிப் படுவப் பத்திலிறங்கிய பசுவை
பக்குவமாய் மீட்ட கதை சொல்கின்றனர் மீட்பர்
கனத்த மனதுடன் வைது கொண்டே 
பண்டுவம் பார்க்கிறாள் நல்லாச்சி
செங்கரும்புத் தோகை மென்முள் அப்பிய கையை
முதுகின் பின்னொளித்துத் திருதிருக்கிறாள் 
தன் முறை வரக் காத்திருக்கும் பேத்தி.

0 comments: